”Periodika”-paindištos eloho läksi uz’ kirj vepsän kelel lapsiden täht. Kirjan tegii om vepsläine kirjutai, äjiden starinoiden da romanoiden avtor Natalja Silakova. Kirjale anttihe ”Nel’l’ dölod”-sarnan nimen. Kaiked kirjaha mülüb 13 sarnad.
— Olen ozakaz, miše kirj läksi eloho. Kirj tuli lujas čoma. Kitän Larisa Čirkovad, kudamb om kändnu kirjan vepsän kirjkel’he. Olen ihastusiš, miše necen kirjan voiba lugeda ristitud, a mugažo openikad školiš da universitatas, nadeimoiš, miše se tuleb mel’he heile, sanub kirjan avtor.
Kirj läksi eloho Karjalan rahvahaližen da regionaližen politikan ministerstvan rahatugele. Čomad kuvad kirjan täht om tehnu taidehpirdai Dmitrii Dmitrijev. Kirj linneb čoman lahjan lapsile i kaikile, ken opendab vepsän kel’t, kelle om melentartušt vepsän rahvaz i sen kul’tur.