Uz’ “Keskijärviden peitusid” -tedomašinvänd om omištadud vepsläižile
Vodel 2025 lähteb eloho “Keskijärviden peitusid” -tedomašinvänd, mitte om omištadud vepsän rahvahan kul’turale, fol’klorale, kelele da tradicijoile.
— Vänd tehtas vepsläižiden norele sugupol’vele, päazjan – školiden openikoile. Vänd om tehtud sen täht, miše sündutada rorištol melentartuz’ ičeze kel’he, antta voimuz opeta vepsän kel’t vätes, tehta opendusen processad melentartuižembaks. Miše sirttas süžetadme vändos da kosketadas vändon hengidenke, pidab opetas da vahvištoitta sadud tedoid praktikal, sanui “Oma Mediale” vändon tegii Ruslan Nordinsen.
Vänd anttas maksuta školiden openikoile, kudambad opendaba vepsän kel’t, mugažo erazvuiččiden regionoiden vepsläižiden diasporoiden ezitajile. Tedomašinvänd mugažo pandas popul’arižile internet-platformile, kus kaikutte tahtnik voiži ostta se ei suriš rahoiš.
— Mö mugažo tahtoim kingitada ristituiden homaičust vepsän kel’he da kul’turaha, miše vändajad tedaižiba siš hot’ vähäižen. Vänd pandas mirun tetabile platformile erazvuiččil kelil, sidä kesken anglian-ki kelel, jagoihe Ruslan Nordinsen.
Tulijal aigal projektan tegijad planuičeba mugažo tehta karjalaine vänd, mitte opendaiži vändajid karjalan kel’he.
Uzištoid neciš temas voib lugeda mugažo suomeks da venäks.
