Uvven vuvven da Rastavan hyvittelyt karjalan kielel
Karjalan Rahvahan Liitto jo tostu vuottu pidi lapsien luajittuloin hyvittelykortiloin kilvan. Karjalankieline uvven vuvven hyvittelykorti -online-kilbah voidih yhtyö 5—14-vuodehizet lapset. Tärgevin ehto oli se, ku korti Uvvekse vuvvekse libo Rastavakse pidi luadie omin käzin da sit vältämättäh pidi olla omal käil luajittu kirjutus karjalan kielel.
— Tänä vuon kilbah oli työtty enämbi 100 hyvittelykortii Karjalan tazavallan eri kolkis. Net oldih guašil da vezimualoil luajitut, oli gruafikan-tabah valmistettuloi da kazvilois luajittuu. Voittajii valličči arvostusjoukko, kuduah kuuluttih Karjalan Rahvahan Liiton johtokunnan rahvas, sanoi Oma Mediale Anna Jakovleva, Karjalan Rahvahan Liiton piälikkö.
Kilbuniekkoi juattih kolmeh joukkoh: 5—7 vuottu igähizet, 7—10-vuodehizet da 11—14 vuvven ijäs olijat lapset. Kilburuadoloi otettih vastah talvikuun 10. päiväh suate, voittajien nimet ilmoitettih 15. talvikuudu.
— Parahien hyvittelykortiloin joukos ollah Anukses, Jessoilas, Veškelykses, Videles da Meliorativnois eläjien lapsien luajitut kortit. Kaikkiedah 22 nimie. Kai kilbah yhtynyöt suajah diplomat, voittajat suajah diplomat da lahjat, sanoi Anna Jakovleva.
Karjalan Rahvahan Liiton valmistettavan online-kilvan piätavoiteh on kiinnittiä lapsien mieldy karjalan kielen opastamizeh, kehittiä heijän taidoneroloi.
Yhty Oman Median kanualah Telegramas!
