Uuzi projektu: Kanzallizes teatras avattih ozuttelu
Kevätkuun 27. päivänny pietäh kanzoinvälisty teatroin päiviä. Sih päiväh niškoi Karjalan Kanzalline teatru valmisti spektakliloi da muaster-kluassoi. Paiči niilöi programmas on uuzi ozuttelu.
Ozuttelus suau nähtä artistoi da heijän syväindyliikuttajii ezityksii. Joga fotokuvuamizeh yhtynyöle oli keksitty mitahto kummalline harjaitusruado da hyö ozutetah, midä vois ruadua heijän piähengi täs šeikas.
— Minä rubein fotokuvuamah täyzi-igäzenny olles, ajoingi Piiterih opastumah sih neroh. Suvaičen luadie fotokuvii. Fotokuvuamizen aigah myö annoimmo artistoile kuuzi ruaduo da heil pidi kuvata heijän piähengen tundoloi miärättylöis ololois. Net fotokuvat myö keräimmö ozutteluh, sanoi Oma Mediale fotokuvien luadii Mihail Nesterov.
Karjalas Mihail Nesterovua tundietah psiholougiellizen portrietan muasterinnu. Häi maltau ozuttua ristikanzan neroloi da tundoloi kaameran avul. Fotokuvuaju yhtyy äijih kul’tuurutapahtumih.
Fotokuvuamine täh ozutteluh niškoi on luajittu V momente -projektan hantuzis.
Yhty Oman Median kanualah Telegramas!
