Uuzi kniigu Ingerinmuan pajoperindölöis
Mennyön vuvven aloh Karjala-Suomi ystävysliiton Suomalazet Karjalan kul’tuuras -projektan hantuzis Kielen, literatuuran da histourien instituutan ruadajat Valentina Mironova da Nina Šibanova valmistettih Ingerinmuan rahvahan pajot -kniigan tostu painostu. Enzimäine painos piäzi ilmoih Leningruadas vevvennu 1974, sen valmistajinnu oldih Eino Kiuru, Elina Kylmäsyy da Terttu Koski. Kniigas löydyy rahvahan pajoperindyö, kuduadu tutkijat pandih mustoh Ingrinmual 1950 luvul. Ainehisto säilyy Kielen, literatuuran da histourien instituutan iäniarhiivas da Estounien arhiivas.
– Uvves kniigas kui endizesgi on kaksi ozua, enzimäses on ižoroin eepillizii pajoloi da balladoi, liirizii da svud’bupajoloi, uinotuspajoloi, luguloi, itkuvirzilöi. Toizes – ingeriläzien röntyškii, liežupajoloi da piirileikkipajoloi. Toizen painoksen uvvistuksennu on tävvelline luvettelo, kus löydyy tieduo Karjalan tiedokskukses kaikes tallel olijas ižoroin da ingeriläzien ainehistos. Estounien Literatuurumuzein arhiivas tutkijat tarkistettih omua ainehistuo da pandih uvvet paikkumerkit, sanou Valentina Mironova.
Uuzi kniigu piäzi ilmoih Barea -kniigupainamos da vältämättäh rodieu hyvänny lahjannu kaikile ižoroile da ingeriläzile. Kniigu voibi suaja Kajala-Suomi-ystävysliiton kauti.
