Uuzi kilbu: ken luadis avtomuatillizen muarjoin kerättävän
Karjalas ečitäh inženieroi, ket keksittäs, kui helpombah kerätä muarjoi. Petroskoin valdivonyliopisto Karelia Berriz -seuran kel yhtes ilmoitettih kilvan, kudaman tavoittehennu on luadie laiteh meččymuarjoi keriändäh niškoi.
Kilvan pakičuksii otetah vastah sulakuun 13. päiväs algajen oraskuun 13. päiväh suate. Kilvan ilmoittajat tahtotah suaha moizien laittehien projektoi, kudamii voibi ottua ruadokäyttöh mečäs. Kilbah voibi luadie erilazii mehaniekku- libo elektrokonehtu, abulaitehtu libo työndiä hyvä idei meččymuarjoin keriändäh niškoi.
— Kilvan piätarkoitus on kannattua moizii projektoi, kudamat avvutetah keräillä meččymuarjoi helpombah. Voibi keksie ei vaigu koneh, kudai iče keriäy muarjoi – abulaittehien projektoi sežo voibi työndiä kilbah. Enzimäzekse otammo huomivoh laittehet, kudamat säilytetäh muarjoin luaduu da kudamii voibi käyttiä mečäs, on sanottu Petroskoin valdivonyliopiston sivul.
Yhtyö kilbah voijah laitokset, joukot viideh hengeh suate libo ristikanzu yksinäh. Parahat projektat suajah kannatustu, niilöin varoin vuoh voibi vie ližäkse parendua omua laitehtu. Pakičuksii kilbah projektoin kuvuamizen kel pidäy työndiä sähköpoštah. Ližiä tieduo kilbah nähte täs.
Aihies voit lugie suomeksegi.
Liity Oma Median MAX-kanavalle!
