Uuzi karjalankieline runokirju piäzi ilmoih
Anukses Prilukinan nimellizes livvinkarjalazien muzeis piettih uvven karjalankielizen runokirjan prezentatsii. Kniigan kirjutti Ienimän kyläs eläi karjalaine Valentina Spiridonova.
Valentina Vasiljeva, kudai täytti 73 vuottu, on aktiivine inehmine, häi opastau turistoi da paikallizii eläjii pastamah šipainiekkoi, suksittau, kävelöy keppilöin kel, kirjuttau runuogi.
— Minä runoilen omas kyläs, kyläläzien elaijas, mustelen omua muamua da hänen jygiedy elaigua. Sih nähte ollahgi minun runot, sanoi Oma Mediale Valentina Spiridonova.
Kirju on painettu Ven’an pohjaispuolen naizet -liiton kannatuksel da liiton piälikön Marija Opimahan kehoitukses. Liittolazet kiännyttih rahvahan puoleh keriämäh den’gua kirjan painamizeh. Projektu algavui vuvvennu 2024 da kymmenen kuun peräs kirju piäzi ilmoih. Kirjan painamizeh varua työttih rahvas Ufas, Čel’abinskas, Murmanskas, Arhangel’skas, Karjalan eri kolkis da toizis kohtispäi.
Valentina Vasiljevna hos on karjalaine, ga karjalakse kirjuttua ei malta. Kai hänen runot oldih vaigu hänen mustos. Net pidi iänittiä, kirjuttua karjalakse da kiändiä ven’akse.
Kirjua luadimas oli kogonaine joukko rahvastu. Kirjan čomazien luadii Al’ona Starodubtseva löydyi Altail. Runot ven’akse kiändi Anastasija Lebedeva. Runoloi iänes kirjutettih Ivan Kalmikov, Julija Grafova, tekstat toimitti Tatjana Paškova.
Kirjan nimekse on pandu ”Karelija. Megrega”. Paiči runoloi kirjas on etnogruafistu ainehistuo livvinkarjalazis, kuduat andoi painettavakse Prilukinan nimelline livvinkarjalazien muzei.
— Tämä kirju on minule kuldua da hobjua kallehembi, se on kaikis suurin minun rikkahus, sanoi Valentina Spiridonova.
