Uuzi julgavo: Puadenen kolkan suusanallistu perindyö
Petroskois Ostrov-julguamos piäzi ilmoih uuzi kirju, kuduan kanzien välih on pandu Timofei Turujevas kirjutettuloi suarnoi da bilinoi. Kogomuksel ”Timofei Jefimovič Turujevan suarnua da bilinua” on pitky histourii. Se oli kerätty vie vuvvennu 1941, sen luadi tundiettu vepsän kielen tutkii Nikolai Bogdanov.
— Häi tuttavui Sellin kylän karjalazeh Timofei Turujevah 1930-luvun lopus da äijän kerdua käi händy pagizuttamas. Vuvvennu 1877 rodivunnuh Timofei Jefimovič pagizi enimytten karjalakse, ga saneli bilinoigi ven’akse. Toiči häi iče kiändi ven’as karjalakse, kirjutti kiännöksii da työndi kačottavakse Petroskoin kul’tuuruinstituuttah, sanoi Oma Mediale Valentina Mironova, kogomuksen painettavakse valmistannuh.
Uvven kirjan hommai Sellin kylän alovehelline yhteiskunnalline ičehalličus, kudai kirjutti projektan da sai Kanzallizen da alovehellizen poliitiekan ministerstavn kannatustu. Puadenen da Sellin kylän eläjät kerättih oma vuitti den’gua, kuduat pidi projektan todevuttamizeh, autettihgi sponsorat.
Kogomukseh kuuluu 16 suarnua, 10 bilinua da 10 novinua ven’an kielel. Sen ližäkse kirjah on painettu suarnu, bilinu da novinu karjalan kielel.
Kirjah on painetytu QR-koodu, kuduan kauti voibi piästä Tiedokeskuksen Kielen, literatuuran da histourien instituutan Karjalan runonpajattajat: verkosanakniigu -sivule da kuunnela Timofei Turujevan iändy.
Kirjan painolugumiäry on 300 palua.
Yhty Oman Median kanualah Telegramas!
