Uuvvet videot kerrotah Karjalan keškiajoista
Keškiaikani Karjala -videošarja esitettih Karjalan kanšallisešša musejošša. Nellä filmie pukuloista, käsiruavošta, elämäntavoista ta šotilahista ruvetah esittämäh vakituisešša näyttelyššä. Šarjan ohjuajana ta piäkuvuajana oli Viktor Davidyk ta tuottajana musejon tietosihteri Denis Kuznetsov.
— Viimeset tämmöset kuvaukšet piettih noin 20 vuotta takaperin. Šilloin Karjalan keškiaika ei ollun niin hyvin tutkittu ta ei ollun niin hyvie kuvaušmahollisukšie. Nyt myö esittimä tarkkoja ta kaunehie videoja. Kuvaukšet pitimä Paaso-vuaralla ta Muššan kontien linnašša, kun šielä piettih keškiajan kulttuurin festivali. Kuvaukših ošallissuttih Karjalan istorijarekonstruoinnin klubien jäšenet, šano Denis Kuznetsov.
Joka filmi on lyhyt ka tarkka videokertomuš yheštä teemašta. Videoissa ei ole šanoja, vain kuvaukšet, kumpasien mukah musejon oppahat ruvetah kertomah musejoh kävijillä kaikešta, mitä oli kuvattu. Videojen esittelyššä oltih kuvaukšien valmistajat ta ošallistujat, hyö kerrottih, mitä oli kaikešta mukavimpana ruavon aikana.
