Kilpailuh ošallistunuijen projektien tarkotukšena on Venäjän rahvahan yhtevyön lujentamini ta Venäjän kanšojen kehittämini. Kilpailuh on työnnetty 43 anomušta Karjalan eri piirien kanšalaisjärještölöiltä.
– Kilpailušša on kolme nominatijuo “Meijän kantatuattojen mua”, “Karjala – šovun aloveh” ta “Projektit, kumpasie toteutetah Karjalan muutomašša piirissä”. Kilpailun komiisin jäšenet kačeltih kaikki anomukšet ta annettih luvan ošallistuo kilpailuh 34 projektilla, ilmottau Karjalan tašavallan kanšallišen ta alovehellisen politiikan ministerijön lehistöpalvelu.
Kilpailun komiisissa on 11 ihmistä – Karjalan kanšalaiskamarin, kanšalaisneuvoštojen, kanšalaisjärještöjen, vallan toimehpanijien elimien etuštajat. Enšimmäini issunto piettih 11. oraškuuta ta šiitä päiväštä alkuan 15 päiväššä komiisin jäšenet kačellah kilpailuh ošallistunuita projektija. Šen jälkeh vielä kolmen päivän aikana ilmotetah kilpailun voittajat.