Petroskoin urheilukoulu numero 3, atlettien liitto ta Petroskoin hallinto piettih perintehellisen uuvvenvuuvvenjuokšun. Eri-ikäiset ihmiset 1. pakkaiskuuta puolipäivällä piätettih juošša yheššä.
— Tänä vuotena juokšu yhisti yli 150 juoksijua. Jokahini voipi iče valita kuin monta kilometrie še tahtou juošša tahi aštuo. Niise myö ilmottima kilpailun, ken tulou mukavimmašša uuvvenvuuvvenpuvušša, še šuau erikoislahjan, šanottih juokšun pitäjät.
Ilotulituš anto startin juoksijilla. Lopušša heitä vuotti Pakkaisukko ta kostitti kuumalla čäijyllä tahi glintveinillä. Juokšuh tuli ihmisie yštävineh tahi perehineh, a ken tuli yksin varmašti vaštautu šielä tuttavien kera.
— Mie toista kertua ošallissun uuvvenvuuvvenjuokšuh. Enšimmäini oli vuotena 1984 vuotta takaperin, konša opaššuin Amerikašša, Kanzasissa ta nyt enšimmäistä kertua tulin Petroskoin juokšuh, šano juokšun ošallistuja Il’l’a Padčin.
Urheilupito oli omissettu toivomukšien toteuttamisella. Urheilijät šuatih kirjuttua rintanumeroh, mitä hyö tahotah tänä vuotena. Urheilijat kirjutettih urheilušuavutukšie, opaštujat toivottih ičellä mäneššyštä opaššukšešša, lapšet toivottih lahjoja. Ka šuuremmalla ošalla ošallistujista oli toivomuš, jotta vuosi toisi iluo, rauhua, onnie ta kaikkie hyvyä.