Uuttu kniigua: Suomes piäzi ilmah “Adaman gruunu”
Knnigan s’užietan mugah Senja da Dani vastatah Senjan buaban koin lähäl olijas mečäs Kondien. Se Kondii on kuningahan roduu da on tulluh muale taivahan tiähtispäi. Hänel on tärgei ruado mual. Lugijes tiijustat, mittumihbo bekettilöih ystäväzet puututah Kondien matkan aigah da kenbo hiivou heijän jälles da kunnebo hävitäh karjalan kielen sanat.
– Komiksusanakniigu tuou lapsile karjalazien surnoin tiedovoičustu. Kniigas on ylen čomasti kuvitettu eri aihieloih kuulujat sanat, niilöih hyväs mieles opastutah eri-igäzet lugijat. Adaman gruunu -kniigua lugijes hengen salbuau dai samal aigua mustoh jiäy uuzii sanoi, kirjutti KarjalanSivistysseuru omal saital.
Vereksien tiedoloin mugah tänäpäi Suomes on 11 000 hengie, kudamat hyvin paistah karjalakse da 20 000 hengie, kudamat ellendetäh kieldy, ga paistah vähän. Uuzi kniigu rodieu avukse karjalan kielen opastujile, kieliaktivistoile da kaikile, ket ollah kiinnostunnuoh kielen säilytändäh da elvytändäh.
Kniigan ollan luajittu Katerina Paalamo da Sanna Hukkanen. Katerina Paalamo on karjalan kielen kiändäi, häi opastau suvikarjalua Päivännouzu-Suomen yliopstos. Paalamon juuret ollah Suojärvel. Hänen kielineroh kuulutah kieliopastus da karjalankielizes lapsusaijas suadu kielenmalto. Sanna Hukkanen on jovensuulaine komiksointaidoilii da kuvuaju, kudaman ruavos nägyy suvaičus meččih da starinoih. Häi opastuu karjalan kieleh da on pidänyh komiksuruadopajoi suomelas-ugrilazile vähembistökielien kandajile aktivistoile Ven’al, Suomes, Norviegies da Estounies.
Algutevos “Adaman gruunu” on kirjutettu suvikarjalakse. Vienankarjalakse kniigan (Otavaisen kruunu) on kiändänyh Ol’ga Karlova da livvikse (Odavan koronu) – Ilja Mošnikov.
Kniigan prezentatsii pietäh kezäkuun 3. päivänny YouTubes da Facebookas da paikan piäl adresil Kulttuuritehdas Siihtala, Nurmeksentie 4, Jovensuu.
