Uuttu böbökkiä on löytty Karjalas
Karjalan tiedoakadeemien entomolougat pandih merkile omis ruadomatkois enämbän 30 uuttuu böbökkiä, kudamii enne Karjalas ei arvattu. Meččyinstituutan tiedoruadajat Andrei Humala da Aleksei Polevoi jullattih oman monivuodehizen yhtehizen ruavon tulokset. Tutkimus on omistettu tazavallas eläjien böbököin moniluaduvuksele. Tiedokirjutukses on mainittu 33 böbökkiä, kudamii enne vihjattu Karjalas.
Rinnal olijas Suomes on tietois enämbi 23 tuhattu böbökkiä, Karjalas vuodeh 2024 oli tovestettu 12 037 böbökkiä eri luaduu. Se vihjuau sih, ku Karjalas nygöi on merkitty vaigu puolet böbököis, kudamii voibi olla meijän alovehel.
— Suvi-Karjalas enzi kerdua on huomattu vezikorendo Coenagrionidae-suguu. Enne sidä nähtih vaigu Suomen suvipuoles da Ven’an suvembil alovehil. Paiči sidä Karjalas enzi kerdua on vihjattu Tingis ampliata -kruuživolutikku, net mennyön vuozisuan puolivälis piästih Moskovan da Kiirovan pohjazile alovehile, a vuvvennu 2013 niidy nähtih Komin tazavallan suves. Enimät böbökät ei luajita pahua muatalovuole, hos on varavuo, ku pahua böbökkiä voibi tulla meijän muan suvembis kohtis da päivännouzupuoles. Tänäpäi kaikis pahin da varattavin meččäh niškoi on kojansyöjy böbökky, kudaman lugumiäry ruttoh nouzou Karjalas vuvves 2000 algajen, on ilmoitettu Karjalan tiedokeskuksen virrallizel saital.
Mennyt vuon meijän entomolougat enzi kerdua vihjattih Karjalas Anopheles claviger -verenimijöi čakkoi, kudamien n’okattuu ristikanzu voibi suaja mal’arija-voimattomuon.
Aihies voit lugie vepsäksegi.
