Uušista oppikirjoista kerrottih seminarissa
Eklein Karjalan opaššukšen kehityšinstituutissa piettih metodini seminari “Kirjallisušlukomisen oppikirjat 1. luokkua varoin karjalan, vepšän ta šuomen kielellä”.
Kirjallisušlukomisen oppikirjat 1. luokkua varoin (0+) oli painettu Karjalašša 2024 vuuvven lopušša. Uušilla oppikirjoilla omissettu metodini seminari piettih Karjalan opaššukšen kehityšinstituutissa 23. pakkaiskuuta. Seminarih otettih ošua kirjallisušlukomisen oppikirjojen luatijat ta toimittajat šekä karjalan, vepšän ta šuomen kielen opaštajat.
— Seminarin aikana myö rupiemma pakajamah šiitä, mitein käyttyä uušie kirjallisušlukomisen oppikirjoja 1. luokkua varoin muamonkielen tuntiloilla šekä oppituntien ulkopuolisissa harjotukšissa, šelitti Karjalan opaššukšen kehityšinstituutin vanhempi metodisti, oppikirjojen luatija Ol’ga Hramtsova seminarin alušša.
Kirjallisušlukomisen oppikirjoissa on runoja ta proosatekstijä šekä mukavie tehtävie. Seminarin lopušša vietetyššä muasteri-opissa kaikin šuatih leikkimuuvvošša tuttavuštuo oppikirjojen tehtävih ta verrata erilaisie muamonkielijä.
Kirjallisušlukomisen oppikirjat šuahah ne koulut, missä lapšet opaššutah karjalan, vepšän ta šuomen kieltä.
