Uušie oppikirjoja lapšilla
Karjalašša on painettu Kirjallisušlukomisen oppikirjat 1. luokkua varoin. Kirjallisušlukomisen oppikirjat on karjalan, vepšän ta šuomen kielellä. Niissä on runoja ta proosatekstijä šekä mukavie tehtävie. Kirjat täyvennetäh 1. luokan Muamonkielen oppikirjoja.
Oppikirjan avulla koululaiset opaššutah kuuntelomalla ymmärtämäh kieltä ta pakajamah. Oppikirjoja voipi käyttyä Muamonkielellä kirjallisušlukomisen tahi Muamonkielen tuntiloilla.
— Oppikirjan avulla lapšien pitäy opaštuo erottua proosa- ta runotekstijä, tuntie runojen ritmie ta loppušointuo. Tehtävät on valmissettu leikkimuuvvošša. Opaššukšen aikana pitäy käyttyä kulttuuri- ta runoušaspektie. Pakajamašša lapšien kera opaštajan pitäy olla tuntehellisešti mukana šekä laušuo tekstijä yheššä koko luokan kera. Täššä oppikirjašša ei ole kielioppie, šelitti Karjalan opaššukšen kehityšinstituutin vanhempi metodisti Ol’ga Hramtsova.
Kirjojen luatijina ollah Ol’ga Hramtsova, Nadežda Petrova, Jelena Ruppijeva, Jelena Pankratjeva, Jelena Šumilova. Oppikirjoissa on Dmitrii Dmitrijevin valmistamie kirkkahie ta kaunehie kuvie. Oppikirjat šuahah ne koulut, missä lapšet opaššutah karjalan, vepšän tahi šuomen kieltä. Tuttavuštuo oppikirjoih voipi enši vuuvven pakkaiskuušša karjalan, vepšän ta šuomen kielen opaštajie varoin järješšetyššä seminarissa.
Aihiešta voit lukie niise šuomekši.
