Karhumäjen piirissä avattih uuši autotie, kummaista myöten šuau piäššä Karjalan piänähtävyöllä – Kižin šuarella – autolla. Noin 32 kilometrini tie rakennettih nykyaikasien vuatimukšien mukah. Uuvven tien tarkašti Karjalan piämieš.
– Tämä tie on luajittu enšiksi Kižin šuaren vierahilla ta Karjalan eläjillä. Piäššä šuarella nyt on helpompi – Kiži tuli kaikilla lähemmäkši, šano Kižin musejon johtaja Jelena Bogdanova.
– Šamoin tämä tie auttau Oneganiemen alovehen kehittämistä. Myö rupiemma šitäki kehittämäh. Šuunnitelmissa on luatie etnopuiston, mi kertois näijen maijen eläjien kulttuurista ta venäjän bilinoista, kumpasien kotimuana on Oneganiemi, korošti Artur Parfenčikov.
Tie oli avattu 30. talvikuuta ta šamana päivänä Ojatevščina-kyläššä avattih turistien info-keškuš. Nyt šielä šuau oštua lippuja šuarella, muistolahjoja ta šuaha tietoja Kižistä. Ojatevščina-kyläštä Kižilla vierahie viijäh ilmapielušlaivalla.