Uuši näyttely kertou Tverin alovehen karjalaisista

Näyttely voipi kaččuo kirjaštošša koko kešän. 0+ Kuva: Uljana Tikkanen

Tverin alovehella karjalaisien perintehellistä kulttuurie esittämät musejovehkehet ollah esillä nyt Tverin Gor’killa nimitetyn kirjašton aulašša. Näyttely on omissettu Venäjän kanšojen kulttuurivuuvvella ta on järješšetty kirjašton yhteisruavošša karjalaisien järještöjen ta Lihoslavlin karjalaisien kotišeutumusejon kera.

– Karjalaisešša musejošša ruatuas’s’a aina ymmärrät, jotta musejo on niin kuin polku tietoh. Myö näytämmä polkuo tietoloih karjalaisista – Tverin alovehen alkuperäiskanšašta. Olemma hyvällä mielellä, jotta karjalaiset ei jiäty aikojen šyvyöh, a tämä kanša ta heijän kieli eläy, šano näyttelyn avajaisissa Lihoslavlin musejon spesialisti Jelena Romanova.

Kirjašton aulan näyttelyoša jo moničči oli omissettu karjalaisilla, heijän kielellä, kirjoilla karjalan kielellä. Vuuvvešta vuoteh tietoja lisänöy ta kirjaštošša ušotah, jotta karjalan kieltä šuau kuulla, a karjalan kulttuurie voipi nähä eläjänä vielä monie vuosie Tverin karjalaisien mailla.