“Uskondtedo mujuiš”: om endištadud vepsläižen monastirin kuz’ jumalašt
Petroskoin da Karjalan mitropolitan Konstantinan blaslovidandan mödhe vepsläižes Iona Jäšjärvelaižen monastiriš tehtihe “Uskondtedo mujuiš” -projektan ühthevedod. Siš tedotadas Venäman ortodoksižen uskondan Petroskoin da Karjalan jeparhijan oficialižel internet-lehtpolel. Projekt oli rahatugetud Karjalan Pämehen grantoiden fondal, i sen aigan täuzin endištadihe unikaližed jumalaižed, miččed oma tärktad vepsläižiden küliden kul’turjäl’gestusen kaičendan täht.
Endištamižen radoiden aigan oli endištadud kuz’ jumalašt: “Pühän Georgijan čud mados”, “Pühä episkop Tihon Zadonskii”, “Spas Vsederžitel’”, “Prepodobnii Sergii Radonežskii”, “Pühä Feodosii Totemskii Spaso-Sumorinan monastirin tagamal” da “Kaikiden gor’as olijoiden Ihastuz” -Jumalan Mamoin jumalaine. Kaikuččen jumalaižen täht oli tehtud endištamižen pasport, kus om kaik radoiden etapad da niiden fotokuvad.
— Om tärged, miše projektaha mugažo mülüi monastirin keradamišton sistematiziruind. Oli tehtud jumalaižiden pasportad da sisteman kartaižed, lugemižen žurnal, oli keratud tedod monastirin muzejan kuvafondan täht, tedotab eparhijan press-služb.
Endištamižen ližaks oli kehitoittud tärged projekt: časoun’ kelotusenke Pühän prorokan Joan-valatajan muštoks.
Varastamatomaks projektan satuseks tegihe se, miše sijaližed eläjad lahjoičiba monastirile kuverz’-se jumalašt, mi ozutab ristituiden tahtod tugeta necidä projektad da kaita vepsän rahvahan kul’turjäl’gestust.
Tarkištele "Oma Median" MAX-kanalad!
