Urualan kieliperehen lapset vastavuttih Viiborgas
Viiborgas kerran kahtes vuvves piettäväh Pohjazen tuulen sävelmät -festivualih kerävyi Urualan kielipereheh kuulujien suomelas-ugrilazien da samojedukanzoih kanduvähembistölöin edustajua — läs 400 hengie. Urualan kielipereheh kuuluu enämbi 25 miljounua hengie. Samah kielipereheh kuulutah karjalazetgi, kudamil ei ole virrallistu kanduvähembistölöin stuatussua. Yhtelläh heidygi sai nähtä festivualis.
— Ičeväil da omal himol šuorivuimmo tänne tulemah. Viiborgu ihastutti, kui hyvin sie vastattih karjalazii da milleh kunnivoijen sigägäläzet rahvas säilytetäh omua ”karjalastu” mennytty aigua, sanoi Oma Mediale Natalja Bogdanova.
Festivuali kesti 3.–6. syvyskuudu, sidä piettih Piiteris da Viiborgas. Pidoh tuldih mansit da hantit, saamelazet, nensat da ensat, sel’kupat, nganasanat, inkeriläzet, vadjalazet, inkeroizet, setukaiset, beserm’anat da vepsäläzet. Festivualin tapahtumien joukos oli kaikenmostu, kudamis kanduvähembistörahvas ozutettih omua kieldy, pajo- da tansineruo. Oligi pivon aigah paginua kielien säilyttämizes da kehittämizes.
Viiborgan histouriellizes puoles on äijy kohtua, kuduas selgieh nägyy karjalan hengi — nimilappuolois da tavaroin nimilöis, koufeiluloin da laukoin čomendukses.
— Festivualih, kudai piettih Viiborgan linnoituksen seinis, myö tiettäväine tulimmo karjalazis ruutis. Ennevahnashäi tiä oli karjalazien eländykohtu. Meidy da meijän ruuttii kerras ruvettih kaččomah da kyzelemäh. Siiriči astujat, tavallizet linnalazet da vakkinazet tahtottih tiediä kaiken — karjalazien histourien, meijän čomendukset, ruutat, kui paikkua piäh azetetah. Mieleh oli kuulta, ku Viiborgas äijät vastah tulluot hyvin tietäh petroskoilastu ruutien ombelijua Natalja Denisovua, jatkau Natalja Bogdanova.
Aihies voit lugie vepsäksegi.
Yhty Oman Median kanualah MAX:as!
