”Urho – Voiton tielöi myöte”: videokerdomus voinah nähte
Kolmas ilmoih piästetty animatsiifil’mu sanelou Karjalan voinutapahtumih nähte. Se kerdou sih nähte, kui petroskoilazet vastustettih fašistoi da piästettih linnua suomelazis valloittajis.
Videon s’užietan mugah Urho-nimelline brihačču lähtöy Karjalan piälinnah Petroskoih, kuduan eläjät voinan aigah ozutettih rohkevuttu da lujuttu.
Videon pohjannu ollah Karjalan frontan partizuanan, tundietun kirjuttajan Dmitrii Gusarovan mustelmat. Urhon matkan aigah fil’mua kaččojes suau tiijustua ei vaigu voinutapahtumien jälletyksen, ga tundie linnas eläjien toivot da varavot, heijän jogapäiväzen vihaniekoin vastustamizen da uskon voittoh.
Erillisty huomivuo fil’mas on kiinnitetty linnan suomelazien valloittamizeh da sih, ku Karjalan piälinnua piästettih vihamiehis rahvas ei kanzua, Nevvostoliiton eläjät.
— Projektu juohtui mieleh EtnoSmart-nuorižofooruman aigah, nuoret aktivistat ehoitettih kerduo voinah nähte animatsien vuoh, ku vaigei da tärgei aihe rodies školaniekoile lähembäkse da ellendettäväkse, ilmoittau Kanzallizen da alovehellizen poliitiekan ministerstvu omassah tiedottehes.
Videodu luadijes pohjavuttih arhiivudokumentoih da voinua omin silmin nähtylöin mustelmih. Tiedopohjua turvai histourientiijon douhtoru Sergei Virigin. Häi tarkasti faktoin todevuttu da kehoitti videon opastuslaitoksis voinutapahtumih nähte kerdojes.
Projektua todevutetah Kanzallizen da alovehellizen poliitiekan ministerstvan kannatuksel.
Video voibi kaččuo täs.
Aihies voit lugie suomeksegi.
Yhty Oman Median kanualah Telegramas!
