Šuomelais-ugrilaiset kirjuttajat keräyvyttih konferenšših
Kakši tapahtumua šuomelais-ugrilaisilla kirjailijilla, runoilijilla, tietomiehillä ta kiäntäjillä piettih Moskovašša. Niijen tarkotukšena oli koroštua, kuin tärkie on näyttyä kanšallisie piirtehie kirjallisuošša, antua kynäilijillä mahollisuon opaštuo ammatillisiksi kirjailijiksi ta runoilijiksi ta kertuo, mintäh pitäy šuattua oikein valmistua muamonkielien venäjännökšet venäjänkielisie runoilijie varoin.
Karjalan tašavallan etuštajina oltih folklorin tutkija Valentina Mironova ta kirjallisuon tutkija Natalja Čikina.
— Kaikki ošallistujat pantih merkillä kielispesialistien puutehta, kumpani tapahtuu šukupolvien vaihon kera. Šekä naiivikirjallisuon teema oli noššettu, kun jokahini, ken kerran kirjutti runon tahi prousan rupieu šanomah iččie kirjailijakši ymmärtämättä, jotta šiih taitoh pitäy opaštuo. Myö Natalja Valerjevnan kera kertoma Karjalan kanšojen kielillä kirjallisuon valmistamisen tilantehešta ta mitein folkloori esiintyy tevokšissa Karjalašša, šano Valentina Mironova.
Forumin ta konferenššin ošallistujat šovittih iellisešta yhteisruavošta, esimerkiksi työntyä omie tevokšie julkaisettavakši toisien kanšojen julkaisuissa ta viettyä uušie tilaisukšie nuorie kynäilijie varoin.
