Šuomelais-ugrilaiset kanšat ečitäh yhteisruavon mahollisukšie
Näinä päivinä Saranskissa pietäh Venäjän forumi “Venäjän etnokulttuurini moninaisuš: nykyaikaset kuot’t’elut ta kehitykšen perspektiivit”.
Forumih ošallistuu 35 joukkuo Venäjän eri alovehilta. Ohjelman tarkotukšena on auttua kanšojen välisen yhteisruavon kehityštä tieto-, kulttuuri- , tutkimuš- ta kielialoilla.
— Karjalan tašavaltua esittäy viisi henkie: Šuomelais-ugrilaisien kanšojen liitto -kanšalaisjärješšön johtaja Anna Anhimova esittäy šeloššukšen nuorisoprojektiloista ta rupieu johtamah Nuorison projektitoiminta: kehityšmahollisukšie -kentän ruatuo, Karjalan kanšallisen teatterin artista Aleksandra Aniskina kertou vepšäläisien ei-ainehellisen perinnön šäilyttämiseštä, tietomieš Aleksandra Rodionova esittäy VepKar-korpussin ruatuo, Viena-etnokulttuurikeškukšen johtaja Julija Filippova kertou nuorisoprojektien toteuttamisešta ta TV-toimittaja Anastasija Šestak kertou kanšalliskielisien TV- ta radiotoimitukšien ruavošta, šelitettih Karjalan kanšallisen ta alovehellisen politiikan ministerijöššä.
Forumin enšimmäisenä päivänä piettih juhlalliset avajaiset ta šiitä ilmotettih parahien nuorisoprojektien kilpailun voittajie. Toisella paikalla piäši Rakaš Karjala -kanšalaisjärješšön projekti “Karjalaini kylä”, kolmannen paikan diplomin šai Karjalaisen kulttuurin Viena-šeuran jäšen Darja Remšu (EtnoYö musejošša on nykyaikani keino kertuo kulttuurista -projekti).
Forumi jatkau elokuun 19. päiväh šuaten. Ošallistujat ruvetah esiintymäh issunnoissa ta ruatamah ryhmissä.
