Šuomelais-ugrilaiset harraštajateatterit yhissettih liittoh
Karjalašša harraštajateatterien Taidosuari-festivalin rajoissa oli piätetty yhistyä teatterit yhteh liittoh. Šen johtajakši on valittu Dmitrii Harakka-Zaitsev.
Harraštajateatterien tominta on yksi parahista keinoista šäilyttyä muamonkieltä ta liittyö karjalaiseh kulttuurih. Taidosuari-festivalin ohjelman rajoissa harraštajateatterin johtajat paistih proplemoista ta niijen ratkaisomisen keinoista.
— Teatterien johtajien ta artistojen pitäy aina šeuruššella toini toisen kera, kehittyä yhteisruatuo ta ryhmien luovie mahollisukšie, auttua toini toista, viettyä yhtehisie tilaisukšie, kertuo teatterimestaruon keinoista, kekšie uušie idejoja, još luova nälkä on ilmeštyn. Nämä proplemat myö voimma ratkaissa, još olemma yheššä liitošša ta još alotamma jatkujan yhteistoiminnan, šelitti liiton johtaja Dmitrii Harakka-Zaitsev.
Liiton šuunnitelmissa n’euvonanto- ta šeuruštelutoiminnan lisäkši on esityšmatkojen ta paikallisien teatterifestivalien järještämini, uušien luovien ryhmien toimintah kuččumini. Nyt nuori järještö valmistau šuunnitelmie ta muovoštuu tulijan toiminnan šiäntöjä. Johtaja toivou, jotta jo lähiaikoina tulou uušie tilaisukšie harraštajateatterih kehittämisekši.
Dmitrii Harakka-Zaitsev on inkeröisien kielen ta kulttuurin šäilyttäjä, Leningradin alovehen kantakanšojen n’euvonantamisen n’euvoššon jäšen, Šoikula-kanšalaisjärješšön jäšen, vähälukusien kanšojen oikeukšien puoluštamisen ekspertti.
