Šuojun kyläs rodih uuzi kižakohtu
Šuojun kyläkunnan haldivo jatkau nostua kyläkundah lapsien kižuandukohtii. Ligakuun allus Šuojun kylän Vostočnaja-pihan lapsil da vahnembil oli suuri ilo: heile avavui oma lapsienkižuandukohtu. Hos tämä kižuandukohtu on kylän pienembii, ga se pädöy pikoi-pikkarazile lapsile.
— Hyvä, ku nygöi ei pie mennä kylän keskuččah lapsenke kižuamah. Täs koin rinnal ollah kaikenmoizet liedžut, mägyriččy, on kylläl aijoitettuu tilua juoksendella, sanou Vostočnaja-pihan eläi Ol’ga Fotina.
— Mugažan linnuymbäristön luadimine -federuallizen programmu ruadau vuvves 2017, sen mugah jo luajimmo kolme lapsienkižuandukohtua – Šuojun kylän Sovetskaja- da Vostočnaja-pihal da Šuojun stansiel kul’tuurutaloin luo, sanou Šuojun kyläkunnan piälikkö Anastasija Sokolova.
Oman kyläkunnan vk-sivul Šuojun eläjät kiitetäh hyväs ruavos Alstroi-laitostu.
