Vuvves 2024 Petroskoin kehittämizen tuksile omistetus oline-istundos Karjalan piämies Artur Parfenčikov saneli, ku uuzi maršruttu rubieu yhtistämäh Derev’anka-kylän da Kondupohjan linnan.
Eräs jo valmehii stansieloi on stansii “Šuiskaja”. Sen infrastruktuuran Karjalan piämiehen käskys jo tarkasti Karjalan tazavallan tietalovuon, ajonevvoloin da yhtevyksien ministran virras toimii Julija Mizinkova yhtes Ven’an raudutiet -laitoksen Karjalan ozaston ezittäjänke. Vuvvennu 2024 stansii “Šuiskaja” kohendettih: azetettih hälyneroitusekruanat, pandih uvvet pihatulet, rakendettih uuzi tarkastuspaviljon. Stansiel on kaikkii vuadimuksii vastuaju platformu.
— Stansii “Šuiskaja” on eländytaloloin rinnal. Paikallizet eläjät voijah piästä hyvis ololois Petroskoih 15-20 minuutas joga siäl, sanou Julija Mizinkova. — Kezäl, linnan sähköpoujezdan käyttöhottamizen enzimäzel etuapal poujezdu rubieu azettumah vaiku jo käytös olijoil stansieloil, niilöin joukos rodieu stansii “Šuiskaja”.
Omat hyvät mielet uudizeh niškoi jo sanottih Šuojun kyläkunnan eläjät kyläkunnan vk-sivul. Vaiku yhtel aigua hyö pietäh varavuo, ku ruadutien ylityskohtu Meliorativnoin lähäl rubieu ruadamah vie pahembi. Šuojun kylän eläjät jo moneh kerdah kiännyttih Ven’an raudutiet -laitoksen puoleh, ku se kohendas semaforan ruavon — toiči avtoubusat da mašinat seizotah sie puolen čuasun aigah da hätkembigi.
— Ylen on hyvä uudine! Vaiku se vie enämbäl pahendau ruadutien ylityskohtan ruavon Šuojun juamal Meliorativnoin lähäl. Olis hyvä, ku virguniekat kiännyttäs “Ven’an ruadutien” puoleh, ku hyö kohendettas semaforan datčiekoin ruavon, ku rahvas ei seizottas puolen čuasun aloh muite salvatun ruadutien tyves, kirjuttau paikalline eläi Kirill Hahajev.
Enzimäzel etuapal poujezdu rubieu käymäh nelli kerdua päiväs. Enzimäzel etuapal poujezdu rubieu azettumah jo valmehil stansieloil: Kondupohjas, Jänišpuolel, Lučevoil, Šuiskaja-stansiel da nämmien eländypaikoin välizil kohtil, Tomitsoil, Petroskoin raudutien azemal, Onežskii-stansiel, Orzegas, Derev’anka-stansiel. Tuliekse aigua pluanois on suurendua azetuskohtien miäry Petroskois, huavatah luadie stansiet Šuojun kyläs da Meliorativnois.
Aihies lugekkua vienaksegi da suomeksegi.