Uhut-šeura yhistäy karjalaisie Vienan perinnön šäilytettäväkši
Šyykuun 25. päivänä, Kalevalan Molbergin taloh keräyty karjalaisie nuapurikylistä ta -piirilöistä. Vuokkiniemen, Jyškyjärven, Kalevalan, Koštamukšen ta Piäjärven karjalan kulttuurie hyväkši toimijien järještöjen jäšenet šekä Karjalan kanšallisen ta alovehellisen politiikan ministerijön etuštajat tultih Kalevalah Uhut-šeuran järještämäh konferenšših. Koko päivä hyö keškuššeltih šiitä, mitä on lähistä kaikilla tullehilla ta mitä ei šua kavottua.
– Lämpimäššä ta yštävälliseššä ilmapiirissä myö pitimä tämän vaštautumisen, mielelläh kuuntelima šiitä, mitä ruatah lähikylissä. Hyvä, jotta nyt kanšallisissa piirilöissä on piätetty luatie virallisie asiepaperija ta leimoja kahella kielellä: venäjäkši ta karjalakši. Niise šopima šiitä, jotta pitäy enämpi ruatua piirin lapšien vanhempien kera, jotta enämpi lašta opaštuis karjalua, šano Uhut-šeura -yheiskunnallisen järještön johtaja Valentina Kovalenko.
Konferenššissa näytettih, mitä ruatah karjalan kielen ta kulttuurin hyväkši: paikallini Nadežda Rastriginan johtama Uhtuan-kapšakki -omatoimiteatteri näytti pätkän uuvvešta Alajärven uutiset -näytelmäštä karjalan kielellä.
Viena-šeura toimiu Kalevalan nuapuripiirissä – Koštamukšen kaupunkipiirissä. Šeurah liitty nuorie jäšenie, kumpaset ollah kiinnoštunuita karjalan kulttuurin kehittämiseštä. Piäjärvi, Vuokkiniemi ta Jyškyjärvi niise työnnettih omien kylien etuštajie konferenšših. Kaikilla oli mukava šuaha tietyä kollegojen kokemukšešta tällä alalla.
Uhut-šeura jäjreštö tänä vuotena juhliu merkipäivyäh – 30 vuotta. Viime vuosina še toteuttau projektija, kumpasien piätarkotukšena on šuaha nuorien kiinnoššušta kulttuurin šäilyttämiseh. ”Kantatuattojen kieli ei šua šammuo” on ykši niistä. Projektin rajoissa jo piettih Muisto-nimisie vaštavukšie, missä muisseltih Kalevalan piirin merkittävie ihmisie. Šuunnitelmissa on vielä luovan työpajan järještämini.
