Uded kirjad: ”Ezmäine änik” vepsän kelel ihastoitaškab penid lugijoid
”Periodika”-paindištos läksi eloho Ol’ga Žukovan kirj vepsän kelel lapsiden täht – ”Ezmäine änik”. Sen toimitai om Nina Zaiceva, taidehpirdai – Margarita Jufa.
Kogomusehe mülüba kut runod, muga sarnad da starinad, miččed starinoičeba voden aigoiš, kodiröunan londuses, lapsiden holiš. Pähenged oma lapsed, živatad, londusen il’mehed.
— Ol’ga Žukovan runod, starinad, sarnad lapsiden täht oma lühüdad, ned om kirjutadud kebnal vepsän kelel. Niid Ol’ga kerazi äi vot. Kaikuččehe sanaha, kaikuččehe rivihe, mitte om kirjutadad avtoral kodikelel, om pandud sur’ armasuz da arvostand ičeze kodimaha, vepsän rahvahan kel’he, kul’turaha, tradicijoihe. Meletan, ”Ezmäine änik” tuleb kaikile mel’he: i lapsile, i aigvoččile. Kirjan lähtend om sur’ ihastuz meiden, vepsläižiden, täht i sur’ panend vepsänkeližen literaturan kehitoitandaha, sanub ”Kodima”-lehtesen pätoimitai Irina Sotnikova.
Kirj linneb hüvän abunikan opendajile vepsän kelen urokoil da kursil, kaikile, ken opendab vepsän kel’t.
”Ezmäine änik”-kirj paindihe Vepsän kul’tursebran ”Kel’ – minun Kodima”-projektan abul Karjalan pämehen grantoiden fondan rahatugele. Sen tiraž om 300 kirjad.
