Tyttiteatru Čičiliušku: 20 vuvven taival
Karjalan kielen nedälin hantuzis karjalaine tyttiteatru Čičiliušku sanelou omassah ruavos da kahtenkymmenen vuvven pitkäs taibalehes. Piduo valmistetah 17. sulakuudu Rahvahallizien kul’tuuroin keskukses.
— Tänä vuon teatru täyttäy 20 vuottu. Suuret pivot piemmö kylmykuun aigah, konzu rubiemmo ozuttamah uuttu karjalazien suarnoin pohjal luajittuu spektaklii. Täl sulakuun vastavuksel tahtozimmo mustoittua kaikkii, ket oldih da ruattih teatras — Pekka Zaikov, Natalja Golubovskaja, suomelas-ugrilazien kielien da kul’tuuran laitoksen opastajat da opastujat, kuduat oldih teatrua perustamas, sanoi Oma Mediale Boris Kudr’avtsev, Čičiliušku-teatran piälikkö.
Boris Kudr’avtsev ruadau teatras jo 17 vuottu, häi hyvin tiedäy, kui valmistuu ozutelmu, sih nähte häi sanelougi petroskoilazile vastavuksel, kudual ozutetah endizien ozutelmien — Koirin Kalevalan da Horšma-šoun pienii palazii. Pidoh tulluzil rodieu mahto luadie kuva tyttiteatran artistoin da ozutelmien urholoin kel.
Piäzy pidoh on ilmaine. Kaikkii, kedä kiinnostau tyttiteatran ruado, vuotetah Kanzallizien kul’tuuroin keskukseh Leninan lagevole, 2.
