Tverinkarielazin viestit -rubrikki ilmešty “Omašša Muašša”
Šajekuun lopušša Oma Mua -lehen toimitukšen puoleh kiännyttih tverinkarjalaiset kieliaktivistit ehotukšella kerta kuukauvešša painua leheššä šivu heijän murtehella.
Toimitukšen ruatajat mielelläh šuoššuttih täh idejah, ta jo pimiekuun alušša enšimmäini šemmoni šivu ilmešty. Šiinä on esitetty Aleksandr Bulkinin Mielet Luadogah näh- ta Ol’ga Suhanovan Tverissä viidi uuži runokniigane lapšilla -artikkelit.
Tverinkarielazin viestit -šivun ainehissošta vaššatah opaštaja ta runoilija L’udmila Gromova šekä kieliaktivisti Aleksandr Bulkin.
— Hyvät lugijat! Nyt “Oma Mua” leheššä ruvetah tulemah viestit tverinkarielazilda. Rubiemma tiedämäh enämmän kaikin karielazin eländäh näh i tunnuštuačemma paginataboih. Toivotamma teilä hyviä lehen lugemizen aigua, kirjutti L’udmila Georgijevna šivun alkušanoissa.
Tverin karielat -VK-ryhmäššä Aleksandr Bulkin kirjutti ilmotukšen enšimmäisen šivun painamisešta ta šen merkitykšeštä. Šamoin mieš ehotti kaikkie halukkahie tilata Oma Mua -lehtie.
Tverinkarjalaisilla oma šivu leheššä toi hyvin äijän iluo, vet nyt hyö voijah lukie uutisie omalla muamonkielellä. Šitä ennein tverinkarjalaisilla oli oma Karielan sana -lehti, ka vuuvvešta 2017 še ei piäše ilmah.
Oma Mua -lehen toimitukšeh jo tuli Tverin eläjän Irina Komissarovan materiali Šuomelais-ugrilaisen päivän juhlimisešta Tverissä, niin jotta talvikuun 4. päivänä toini Tverinkarielazin viestit -šivu tuaš rupieu vuottamah omie lukijie.
Aihiešta voit lukie niise šuomekši ta venäjäkši.
