Turistan pasportu: Karjalas luajitah suavutuksien sistiemu gostile
Karjalas turizmualal valmistetah Turistan pasportu -uuttu projektua. Tazavallan gost’at voijah merkitä matkan tärgiet paikat da keräillä nakleikkoi alovehen nähtävyksii kačottuu, sen ruattuu voibi suaja mustolahjoi.
Projektah nähte saneltih Karjalan tiijoituksellizes matkailukeskukses. Turistat voijah suaha ilmaizet pasportat matkailukeskukses libo erilazis turistupaikois. Pasportas on seiččei ozua — legendua, kudamat vastatah turizman tärgevimii suundoi.
— Turistan pasportas on mainittu paikat, kudamih vältämättäh pidäy kävvä tazavallas olles. Nengoine projektu nostattau ližiä mielenkiinduo Karjalah, kerdou Karjalan tiijoituksellizen matkailukeskuksen johtajan Anna Il’čikan sanoi Respublika-uudizien toimisto.
Karjalan nähtävyksii kaččomah käydyy turistat keräilläh ainavoluaduzii nakleikkoi. Tarvittavan lugumiärän kerättyy gost’at suajah erinomazii mustolahjoi. Sidä paiči heil pidäy tovestua oma matku fotokuvil. Projektah yhtyttih koufeilut, laukat, turizmualan laitokset, pasportoin omistajat suajah niilöin tavaroi da palveluloi huogehembal hinnal. Projektan partn’ourat lövvytäh saital ”Legendarnaja Karelija”. Siegi voibi suaja ližiä tieduo mustomerkilöis da nähtävyksis turistan pasportan QR-koodoin vuoh.
Turistan pasportas on Vältämättäh kävvä/kaččuo -oza, kunne on kerätty kaikis ”tärgevimät” Karjalas ruattavat ruavot: Luadogas kezoin kylvendy, Kižin kirikön 22 kuupolan kačondu, Ruskealan retrojunal ajelendu, selfi čakan kel.
Aihies voit lugie suomeksegi.
Yhty Oman Median kanualah Telegramas!
