Tämbeižeks päiväks Karjalas om 21 meclämoipalad, niid jatketas sambutada. Uzid surid lämoipaloid ei ole, no kacmata sihe Karjalan rajonoiš sijaližile eläjile om kel’tüd kävuda mecha. Turistad-žo hondostaba nenid kel’dändoid.
Änižröunan Šoutjärven rajon om teteb ičeze čomal leterandal, se kaiken manitab matknikoid lämil kezapäivil. Kacmata kel’dändoihe turistoid mecas Anižen randal läz Šoutjärved om äi. Sijaline administracii ühtes mecankaičuzkundanke tegeb kaiken, miše oliži järgestuz. Turistoidenke pagištas, heile sel’genzoittas, miše nügüdläižiš oliš ei sa tehta nodjoid, pidab lähtta mecaspäi.
– Ku sijaližed eläjad el’gendaba i ei kävugoi mecha, ka turistad keskustaba kel’dändoid. Hö tegeba nodjoid, eskai pandas mobiližid saunoid. Kelle-se täudub paginad i hö ajaba kodihe, toižed ei kulgoi meid, heile anttas vigamaks. Ühted ajaba, toižed tuleba, nece om agjatomašti, sanub Šoutjärven administracijan pämez’ Irina Safonova.
Rad jatktase, administracijan polespäi kaik azjad om ottud tarkištelusehe, kuni zakon kel’däb kävuda mecha.