Tulimäis ymbäri rodieu turistukompleksu
Karjalan ennevahnazes tulimäis ymbäri Kondupohjan piirin Hirvaksen kohtah nostetah turistutiloi. Enämbi kolmie miljardua vuottu tagaperin tuldu lykkiäjän tulimäin viereh rakendettavan kompleksan nimi rodieu ”Luonnolline geolougine Paleovulkan Hirvas -puusto”.
Petroskoilaine Trol’l’ Servis -laitos ottavui ruadoh vuvvennu 2024, projektu kestäy viizi vuottu. Rakendukseh on jo pandu 24 miljounua rubl’ua.
Kymmenes kuus alovehele on käynnyh läs 60 tuhattu hengie, läs puolet niilöis käydih joukolleh. Tävvellizen valmehen infrastruktuuran ruadoh panendu andau turistoile mahton viettiä tiä enämbän aigua da ymbäri vuvven.
Jo on nostettu vizitkeskus da olendutilat. Täl aigua kunnostetah kačondukohtii, azetetah aidoi da pordahii, luajitah sildua poikki ojas da pannah tulien koufeilun alužimii. Konzu tilat roitah valmehet sie rodieu 16 uuttu ruadokohtua. Rakenduksen toizeh vuoroh ruvetah kunnostamah puuston mualoi 28 tuhandel nellikkömetril. Tiä rodieu geolougine ozuttelu, mustolahjoin laukku, lapsien kižakohtat. Täh ruadoh pannah enämbi 40 miljounua rubl’ua.
— Meijän mieles on luadie tämä puusto suurembakse, ku rahvas tuldas tänne ei puolekse čuassuu, čuasukse, ga kogo päiväkse. Luajimmo ekokujot, kävelytaibalehet, nostammo geolougien muzein, koufeilun, sanoi Trol’l’ Servis -laitoksen piämies Ol’eg Golovko Karjalan piämiehen lehtistöpalvelule.
Hirvaksen tulimägi on ainavoluaduine luonnon mustomerki. Sinne käyjät voijah nähtä endizen tulimäin huruan kounusan paltien da tulimäin suun, kuduan suurus on 20 metris 50 metrih suate. Kaikis kaunehimannu endine tulimägi on vien laskun aigah, konzu vezivoimalu laskou liijat viet da endizes tulimäis sikse aigua rodieu suuri koski.
Aihies voit lugie suomeksegi.
Yhty Oman Median kanualah MAX:as!
