Tulgat čukloutamhas vepsän rahvahan kul’turaha!
30. sulakud, Venäman igähižiden vähäluguižiden rahvahiden päiväl, Karjalan Rahvahiden sebruden kodiš mäneb “Jäl’gestuz da nügüd’aigaližuz’: eläbiden starinoiden eht” -azjtego. Nece om omištadud vepsän rahvahale da sen kul’turale, miš tedotadas Rahvahiden sebruden kodin oficialižel Vkontakte-lehtpolel. Praznik om sündnu muloi Venäman Prezidentan käskön mödhe, i täl vodel sidä praznuitas ezmäižen kerdan.
Ehtan programmaha mülüba lekcijad, miččed om omištadud vepsläižen kul’turan erazvuiččile polile: kelile, literaturale, fol’klorale, tradicijoile, a mugažo sille, kut nügüd’ kaitas vepsän rahvahan jäl’gestust. Lekcijad lugeba tedomehed, aktivistad, joukvestišton radnikad da toižed vepsän rahvahanke sidotud specialistad. Sen ližaks adivoil linneb voimuz ühtneda mastar’-klassaha da nägištada “Noid”-vepsläižen muzikjoukun ezitusen.
— Vedämaha mastar’-klassan mö kucuim “Vepsläine”-studijan mastarid. Ühtes adivoidenke hö tegeba muštlahjan — penikaižen heboižen, mitte om čomenzoittud tradicionaližel vepsläižel ornamental. Lekcijad mugažo linneba ani melentartuižed. Varastam ehtale kaikid tahtnikoid, sanui Rahvahiden sebruden kodin aigsijaline pämez’Aleksandra Kuznecova.
“Jäl’gestuz da nügüd’aigaližuz’: eläbiden starinoiden eht” mäneb 30. sulakud 15:00 časud Karjalan Rahvahiden sebruden kodiš (German Titovan ird 3, sur’ zal). Miše ühtneda ehtha, tariž registriruidas eriližel lehtpolel. Sijoiden mär om röunatadud.
Ehtan tegeb “Periodika”-painišt ühthižtös Vepsän kul’tursebranke, “Vepsläine”-studijanke da Karjalan Rahvahaližen i regionaližen politikan ministerstvan tugel.
Tarkištele "Oma Median" MAX-kanalad!
