Tulgat kirjutamha “Minun kodima” -etnodiktant!
20. uhokud Rahvahiden sebruden kodiš tehtas etnodiktant vepsän kelel. Nece azjtego om omištadud Rahvahidenkeskeižele kodikelen päiväle (21. uhokud), i sikš ristitud kirjutaba Ühthižvenälaižen etnodiktantan Venäman Pohjoižen, Sibirin i Edahaižen Päivnouzman vähäluguižiden rahvahiden kelil. Täl vodel etnodiktantan temaks om tehtud “Minun kodima”, tedotadas Karjalan rahvahaližen da regionaližen politikan ministerstvan oficialižel VKontakte-lehtpolel.
— Etnodiktantan pätegend ei ole tarkištelda ristituiden kirjmahtod: sen abul tahtoitas kingitada homaičuz Venäman rahvahiden keliden čomudehe da kal’hudehe, mel’dütoitta mehid opendamha da oppimaha nenid kelid, sanutas ministerstvas.
Ühtneda etnodiktantaha voib kaikutte Venäman eläi. Ühtnend ei rippub ristituiden igäspäi, uskondaspäi, opendusespäi, rahvahudespäi i kel’mahtoišpäi.
Karjalas kaik tahtnikad voiba kirjutada diktantan pätničan, 20. uhokud, 17:00 časud Karjalan Valdkundan Rahvahiden sebruden kodiš (Petroskoi-lidn, German Titovan ird 3, 1. žir, Karjalaižiden, vepsläižiden da suomalaižiden keliden resurskeskuz).
Etnodiktantan ühthevedod tehtas voden 2026 keväz’kun lopus.
16. uhokud etnodiktant keskvepsän paginal kirjutadihe Piteriš (tekstaks oli ottud “Mez’ da kond” -sarnan Nikolai Abramovan versii), a 17. uhokud etnodiktant mäni Kujas (kirjutadihe Nikolai Abramovan “Veden al” -starinan tekst).
Tarkištele "Oma Median" Telegram-kanalad!
