Tuaste paginal rodieu turizmu
Periodika-julguamon piän al toimijas Karjalan tazavallan kanzoin ystävyskois tänäpäi pietäh Karjalan tazavallan piämiehen tyves ruadajan Karjalazien, vepsäläzien da suomelazien edustajien nevvoston vuoronmugahine istundo.
Täl kerdua paginal roitah Šoltarven muzein ruado, Karjalan tazavallan turizmupotensiualan kehittämine karjalazien da vepsäläzien mualoil, sego Karelija — Karjala -etnokul’tuurutaibalehet -projektu.
— Rubien sanelemah muzein suureh ruadoh nähte, meilhäi vuvves kävyy 12 000—14 000 tuhattu hengie. Sanelen probliemoihgi nähte. Meijän muzein taloin rinnal, Mel’kinan koin tyves, seizou Tučinan kodi, kuduas ollah muzein fondat. Vuvvennu 2023 oli luajittu sen koin kohendamizen projektu, ga remontua se vuottau tässäh. Ylen äijäl tahtozimmo, ku Tučinan kois piettäs remontu, ku muzein fondat oldas sie hyväs kunnos da myö enämbän voizimmo ozuttua muzeih käyjile, sanoi Oma Mediale Natalja Anhimova, Šoltjärven muzein piälikkö.
Natalja Aleksandrovna myös kehoittau painatuttua uvvessah kuulužan kodirannan tutkijan da Šoltjärven muzein alguhpanijan R’urik Loninan kirju ”Zapiski krajeveda”, kuduadu nygöi jo ammui ei ole suadavis. Paiči sidä häi tahtos, ku painatuttas suuret da tärgiet arhiivudokumentat, kuduat ollah ruokos heijän muzeis da Karjalan tiedokeskuksen Kielen, literatuuran da histourien instituutas da kerrotah vepsäläzien suusanallizes runohuos, perindölöis da histouries.
Yhty Oman Median kanualah MAX:as!
