”Tuari” rubieu pajattamah ”Tiähtel”
Karjalastu Tuari-etnopajojoukkuo terväh suau nähtä federuallizel kanualal Kanzoinvälizes pajattajien TV-kilvas ”Tiähti-2025”.
Tänä vuon arvostajien joukon piämiehenny on tundiettu ven’alaine säveldäi da prod’useru Viktor Drobiš. Kilbuvalličuksii piettih vie pakkaskuun aigah.
— Ammui tahtoimmo piästä federuallizele kanualale. Edukädehizet valličukset piettih kezäl 2024 online. Kilbuniekat Ven’al da toizil mualois työttih omat ankietat, videot da audiot. Pakkaskuus algavuttih kilbukuundelendat. Net kestettih kaksi nedälii, sih aigah meijän kel ruattih moskovalazet stsenaristat, horeografat, prod’userat. Konzu sinä pajatat da luajitah kuvuamistu, se ei ole ku tavalline konsertu. Täs tärgei on joga askel, joga emotsii. Sendäh ku sidä kuvuamistu nähtäh miljounat. Ga minun mieles myö hyvin kestimmö da kunnon luaduh ezitimmö oman armahan Karjalan, sanoi Oma Mediale Tiari-joukon pajattai Darja Toivonen.
Tiähti-kilvan kilbuniekoin enzimäzii ezityksii suammo nähtä Tiähti-TV-kanualal jo sulakuun 5. päiväs algajen. Edukädeh tiijustua sih nähte, midä ruvetah pajattamah kilbuniekat kilvan siändölöin mugah ei sua. Ga ”Tuari” rubieu pajattamah karjalakse, sendäh ku joukon pajattajien sanoin mugah heijän tuotandos kuvastuu Karjalan igivahnu histourii da pohjaisuolen rahvahien suarnahine muailmu, karjalazien perindöllizet pajot da soittimet.
Aihies voit lugie ven'aksegi.
