Tuari-joukkuo kuunelkua ”Tiähtel”
Tiähti-kanualal jatkuu perindölline Tiähti-kilbu. Tämän vuvven kilbuniekoin joukos on petroskoilaine Tuari-joukko.
Meigäläzii artistoi ruvetah ozuttamah Tiähti-2025-kilvan kuvvendes ezitykses oraskuun 10. päivänny 21.15 aigah Tiähti-kanualal.
Pajattajien sanoin mugah hyvin painui mieleh se hetki, konzu hyö tuttavuttih arvostajien kel.
— Ihan hämmästyimmö, konzu Viktor Drobiš tervehti meidy suomekse. Jällespäi tiijustimmo, ku häi kodvan aigua eli Suomes, kus opastui suomen kieleh, häi hyvin tundou sigälästy kul’tuurua, kudai on lähäl karjalazien kul’tuurua, sanoi Oma Mediale Tuari-joukon pajattai Darja Toivonen.
Meigäläzet ollah hyväs mieles, ku heil on mahto ozuttua omua taidoneruo suurele mierole.
— Tahtozimmo panna merkile kilbuniekoin korgiedu pajatandutazuo, jogahine heis on erinomaine da nerokas astistu. Arvostajat toiči sanotah jyrkäh, ga oigieh, annetah hyviä nevvuo, kerdou Darja Toivonen.
Tuari-joukon pajattajat da soittajat ylen äijäl vuotetah efiirua da uskotah, ku heijän pajo kajahtah kuundelijoin da kaččojien sydämih.
Aihies voit lugie ven'aksegi.
