Trajektorija-šiätijö viettäy Ilmarisen kouluo Šuurišelkä-kyläššä
Trajektorija-šiätijön Ilmarisen koulu Šuurišeläššä -projekti on šivottu Karjalan kanšojen kulttuuriperinnön, tuotantoperintehien ta elämän tutkimiseh ta popularisointih.
— Projektin rajoissa tutkitah Karjalan Aunukšen piirin Šuurišelkä-kylän ainehellista ta ei-ainehellista perintyö. Livviläisellä kylällä on ainutluatuni ta monimutkani istorija tutkimisen ta päivittämisen kannalta, kertou šiätijö poštaukšeššah Vkontaktešša.
Koko kešäkuun aikana Ilmarisen koulun ošallistujat kokenuijen opaštajien joholla tutkitah Šuurišelän arhitektuurie ta luajitah veššettyjä esinehie. Kyläh tuli arhitektuurin ta käsitöijen ihailijie Moskovašta, Piiteristä šekä Nižnii Novgorodin, Vladimirin, Kurskin, Belgorodin, Čel’abinskin ta toisilta alovehilta.
Projekti starttasi kulujan vuuvven tuiskukuušša ta piättyy heinäkuušša 2027. Järještäjät šuunnitellah viettyä kolme kouluo Šuurišelkä-kyläššä, luventoja, puun veššännän studijoja ta projektilaboratorijua. Šamoin projektin rajoissa järješšetäh näyttelyö ta esitelläh esinehie Šuurišelkä-kyläštä.
Ilmarisen koulu Šuurišeläššä-projekti šai Presidentin granttišiätijön tuven.
Yhty Oman Median MAX-kanalah!
