Tradicionaline rahvahaližiden literaturoiden festival’ mäneb Moskvas
Kezakun 4.—7. päivil Moskvas mäneb tradicionaline Rahvahaližiden literaturoiden festival’ “Rusked avoird” -kirjfestivalin aigan. “NacLitFestal” rahvahaližed kirjutajad, runoilijad da kändajad ezitaba adivoile ičeze sädandradod da tundištoitaba heid meiden man äikeližudenke. Siš starinoičeba “Rusked avoird” -kirjfestivalin tegijad azjtegon Internet-lehtpolel.
— “NacLitFestal” adivod löudaba uzid idejoid da voimusid kodikeliden kaičendan da kehitoitandan täht. Festivalil diskutiruidas erazvuiččiden keliden da kul’turiden kaičendas, sanutas “NacLitFestan” Internet-lehtpolel.
Azjtegole keradasoiš kirjutajad, runoilijad, kodikeliden aktivistad, blogerad, kino-ohjandajad, muzikantad da lugijad – kaik ned, ked kaičeba kodikelid da popul’arizoitaba ičeze kul’turad.
Festivalil ezitadas “Venäman rahvahiden nügüdläine literatur: türkižiden da mongoliaižiden rahvahiden runotuz da starinoičuz” -kirj, pagištas pop-muzikan rolin polhe kel’ümbrišton tegemižes. Festivalil mugažo diskutiruidas siš, kut tehnologijad voiba popul’arizoitta rahvahaližid kelid.
Festivalin päazjtegoiden onlain-ozutandad kacujad voiba nägištada popul’arižil Internet-platformil.
Uzišt neciš temas voib lugeda mugažo venäks.
