Tradicijad da nügüdläižuz’: Petroskoiš diskutiruidas rahvahaližen sömižen erigoičusiš
Karjalan pälidnas mäneb “Karjalan rahvahiden keitändlad: egläi, nügüd’, homen” -sessii, sen tegeb “Baltianmeren suomalaižiden rahvahiden liga” ičeze uden projektan aigan.
Sessijan vastused ühtenzoitiba perehiden tradicionaližiden receptoiden kaičijoid, restoranoiden ižandoid, keitäjid, astjoiden tegijoid da mugažo lehtmehid i blogeroid, kudambad starinoičiba Karjalan rahvahiden sömižes. Kaiked — 57 ühtnikad meiden valdkundan erazvuiččiš rajonoišpäi. Hö pagižeba pohjoižen rahvahiden keitändladun erigoičusiš da diskutiruiba siš, kut niid kaita nügüdläižel aigal.
— Keitändlad om sädaiprocess, se ei voi seišta ühtel sijal. Aig vajehtase, keitändlad kehitoitase. No tradicionaližid receptoid-ki pidab kaita. Necen sessijan aigan meile tariž löuta mahtoid kožuda kesknezoi tradicijoid da nügüdläžut, sanub projektan tegii Anna Anhimova.
Paiči necidä azjtegod “Karel’skaja kuhn’a i Točka” -projektaha mülüba mugažo ekspedicijad Karjalan rajonoihe, tradicionaližen sömižen vaumištandan mastar’-klassad, receptoiden foto-ozuteluz, a satuseks linneb uz’ kirj Karjalan rahvahiden sömižes. Projektad tehtas Karjalan pämehen grantoiden fondan tugel.
Tarkištele "Oma Median" Telegram-kanalad!
