TopBLOG: tuhanzien keskes anukselaine
Karjalaine bloggeru L’udmila Korkačeva tuhanzien toizien joukos puutui TopBLOG-projektan finualah.
Kaliningruadan linnas 22.—24. ligakuudu piettävän Šumnii kontent -mediafourumah aigah TopBLOG-projektan hantuzis nerokkahat, kreatiivizet nuoret ezitetäh 150 mediaprojektua. Karjalan tazavallaspäi pidoh lähtöy bloggeru da omaltahtolruadai L’udmila Korkačeva.
L’udmila Korkačovan käzis ollah Anuksen piirin omaltahtolruadajien keskuksen kanualat. Häi kirjuttau internetas, luadiu videoloi, meemoi da tostu kontentua Veikko-hanhen nimes.
— Projektu mustoitti minule, ku kaikkien luguloin, trendoin tagan pidäy olla ristikanzan tovelline histourii. Kaikis parahin kontentu rodieu silloi, konzu ei ole tahtuo roita kuulužakse, vai on tahto andua hyödyy, sanoi L’udmila Korkačeva Karjalan piämiehen lehtistöpalvelule.
Oman bloggan vuoh L’udmila tahtou ozuttua nuorile, ku ruadua hyvytty on kebjei da hyvä.
TopBLOG-projektua todevutetah kanzallizen Nuorižo da lapset -projektan mugah. Eräs suurimis mediaprpojektois yhtistäy niilöi, ket luajitah oigiedu, hyödyllisty da sotsializesti tärgiedy kontentua. Nuoret valmistettih projektoi kul’tuurukoudan säilyttämizes, ekolougies, tervehyös, alovehien kehittämizes, nuoren polven kannattamizes da sähköturvalližuos.
TopBLOG-projektan voittajien nimet sanotah fouruman jälgipäivänny.
