Tiijon päivyä vietetäh tänäpiänä Venäjällä
Tänäpiänä vietetäh omua pruasniekkua ne, ket omissetah omua aikua ta omie voimie tietotutkimukšilla. Karjalan tietokeškuš tänä päivänä perintehellisešti pitäy šuurta tietoneuvoštuo, kumpasešša esiinnytäh kaikkien instituuttien etuštajat.
— Joka vuoši neuvošton teemakši valitah kulujan vuuvven teemua. Tämä vuosi on ilmotettu Opaštajan vuuvvekši. Tapahtumašša luvetah kolme šeloššušta opaštajan roolista XIX-XX vuosišualla, opaštajien valmistelušta Petroskoin valtijon yliopiston kokemukšen mukah ta Elukkojen ekologini biohimijä -koulun toiminnašta, šano Karjalan tietokeškukšen kielen, kirjallisuon ta istorijan instituutin kielitiijön ošašton johtaja Irina Novak.
Šamoin neuvoštošša ilmotetah nuorien tietomiehien tutkimukšien kilpailun ta tieto-tajuttavien ruatojen kilpailun voittajie.
— Lisyän, jotta meijän instituutissa on oma Tiijon päivällä omissettu perinneh. Joka vuosi pruasniekan lähempänä lepopäivänä myö käymmä retkellä Piessan tuoli-paikašša. Perinneh šai alkuo noin 15 vuotta takaperin. Šemmosissa retkilöissä šynnytäh uušie verekšie ajatukšie ta hyvie projektija, kerto Irina Novak.
Tiijon päivänä Tietokeškuš ottau vaštah tiijošta ta tutkimukšista kiinnoštunuita vierahie. Iltapäivällä keškukšen musejoissa pietäh opašretkijä.
