Tie ei keššä šuurta painuo
Kalevalan piirin piämiehen Valentina Bulavtsevan pitämän issunnon piäkyšymykšinä oltih Kalevalan teijen korjauš keškikavuilla ta tašavallan tašon Kemi-Lonka -tien pitämini. Issunnošša esinnyttih Louhen tiejohtamisen piälikkö ta laitokšen Kalevalan ošašton johtaja, Kalevalan kunnallisien sistemien johtaja, Kalevalan raipo -yhtyvehen neuvošton puhienjohtaja ta hallinnon spesialistit.
– Kuunneltuo kaikkie pakinapitäjien esitykšie oli piätetty korjata tiet Kalevalan keškuštašša heinäkuun aikana. Niise oli noššettu kyšymyš Kemin piirissä olijan tien patkän kunnošta. Šitä myöten ajellah jukiet kuorma-autot ta eryähissa paikoissa tie ei keššä niitä. Juuri myö šuamma äijän paikallisien eläjien valitukšie täštä asiešta, šentäh kun še uhkuau Kalevalan piirin ihmisien tervehyttä ta elämyäki, šano Kalevalan piirin hallinnon piämieš Valentina Bulavtseva.
Kemin piirin tielaitoš vaštuau oman piirin teijen kunnošta, ka še oikein vaikuttau Kalevalan eläjien elämäh. Šuurin oša kalevalalaisie käyttäy juuri tätä tietä, kun pitäy piäššä Petroskoih tahi Kola-autotiellä.
Oli piätetty kiäntyö Karjalan tietalouš-, kuletuš- ta yhteyšministerijön puoleh, niise kirjuttua virallisie kirjutukšie Karjalan piämiehellä Artur Parfenčikovilla ta Valtijollisen Duuman kanšanetuštajalla Valentina Pivnenkolla.
