Tervehysministerstvu panou karjalan da vepsän kielet nägövih
Karjalan tervehysministerstvan kehitykses Karjalan feršalipunktoih da ambalatourieloih azetetah nämmien laitoksien nimilavvat karjalan da vepsän kielel. Tervehysministran Mahail Ohlopkovan sanoin mugah tämä kehitys rodieu panoksennu kanazallizeh kul’tuurah da tazavallas eläjien kielikandajien kannatuksennu. Hänen sanoin mugah, muamankieli perustau ristikanzan muailmannägemyksen.
— Muamankieli perustau kanzoin kul’tuurukoudua, auttau rahvahallizien perindölöin kehitändiä. Liijoittelemattah sanon, se on mennyön, nygözen da tulien aijan yhtistäi sildu. Etnizennu jakutannu olles minä hyvin ellendän oman muamankielen säilyttämizen tärgevyön, kirjutti Mihail Ohlopkov omal VK-sivul.
Tiedolavvoin kiännökset valmistettih Karjalan piämiehen tyves toimijah sanastokomissieh kuulujat Aleksandra Rodionova, Marija Remšujeva, Jelena Ruppijeva da Irina Sotnikova.
Projektua todevutetah yhtes Kanzallizen da alovehellizen poliitiekan ministerstvan kel yhtes. Projektu kannattau paikallizien eläjien kul’tuuru-identitiettua.
Aihies voit lugie suomekse.
