Terveh! Terveh!: Löyvä kaveri ta tule opaštumah tverinkarjalua

L’udmila Georgijevna Gromova esitti uuvven kirjan Tverissä, Gorkilla nimitetyn kirjaštošša pietyn pyörie stola -toimenpivon aikana. 6+. Kuva: Uljana Tikkanen

Terveh! Terveh! -nimini oppikirja näki päivänvalkien. Še hyvin paššuau karjalan kielen pakinakurššija varoin. Kirja on tarkotettu niillä, ket opaššutah Karjalan kielen tverin murrehta.

Kirjan valmisti kielitietäjä, pedagogisien tietojen kandidatti, monien kanšalaisjärještöjen jäšen L’udmila Gromova.

— Šen avulla voipi opaštuo uutta šanaštuo ta kielioppie, parantua kielineruo. Harjottelomah karjalakši šuau kuin iččenäisešti, niin ni opaštajan avulla, joukošša tahi yksin. Kirjašša on annettu erilaisie pakinatilantehie, missä karjalan kieltä voipi käyttyä ta šanaštuo, mitä on parempi käyttyä virallisissa pakinoissa tahi koissa, šelitti L’udmila Georgijevna.

Kirjašša on 25 kappalehta, niissä on esitetty erilaisie tekstijä ta pakinatehtävie, lisäkši on šanoja ta kielioppitaulukkoja niise on iäntämisšiäntöjä.

Oppikirjan šivuja koristay piäčkysen kuva, še šeuruau lukijua koko kirjua pitin ta lopušša lintuni löytäy pakinakaverin, min kera čirčettäy karjalakši.