Ühthižvenälaine telekonkurs ”TEFI-Region 2022” valičeb parahimid teleozutelusid, miččed oliba efiras 2021. voden kezakuspäi 2022. voden semendkuhussai. ”Jätan ičein jäl'gen” -fil’m Karjalaspäi putui konkursan finalaha.
”TEFI-Region 2022”-konkursan vägestajad valitas 18 nominacijas. ”GTRK Karelia” oigenzi konkursale ”Jätan ičein jäl'gen”-fil’man vepsän kelel, mitte oli kuvatud Piterin agjas 2020. vodel. 2021. voden sügüzel se mäni efiras. ”Jätan ičein jäl’gen” putui finalaha ”Dokumentaline fil’m”-nominacijas.
— Nece om lujas sur’ ühthižvenälaine konkurs. Meiden toimišt ezmäižen kerdan putui sen finalaha. Sikš meiden täht nece aigtego om jo sur’ sabustuz. Toižed ühtnikad oma lujas vägekahad. ”Jätan ičein jäl’gen” -fil’m sai jo äi vägestusid, olen ihastusiš, miše neniden konkursoiden taguiči sidä kacui äi rahvast, sanub fil’man avtor Maria Šašina.
”Jätan ičein jäl’gen”-fil’m starinoičeb mecnikas Sergei F’odorovas Čaigal-küläspäi, kudamb üksnäze eläb ičeze kodiröunas da ei unohta iceze juriš da kodikeles.
”TEFI-Region 2022”-konkursan ühthevedod tehtas kül’mkun lopus. Vägestajiden pauklahjoičend mäneb Piteriš.