Tehtihe “V nature!” -foto- da videosüžetoiden konkursan ühthevedod
Om tehtud “V nature!” -III Rahvahaližen fotostarinoiden da videosüžetoiden konkursan ühthevedod. Üks’ “Kalaha ei kävugoi edemba mert” -nominacijan vägestajišpäi Nadežda Agapitova oigenzi konkursale videorolikan da ližazi sihe kirjutesen vepsän kelel. Neciš tedotab “Natural’noje hoz’aistvo” -projektan VKontakte-grupp.
— Kezal minun pereh navedib ajada külähä Zaonežjehe. Meiden külä seižub sarel. Mö navedim kalatest. Änižes om äi kalad. Tobjimalaz mö sam ahvenid da haugid. Minä ongitan, a minun mužik da hänen vel’l’ kalataba spinningal. Kalatesen jäl’ghe hö savukuriba kalad vai minun anop’ žarib kalad. Erašti keitän magukast lent, starinoiči Nadežda Agapitova konkursan tegijoile.
Poles vodes konkursan tegijad saiba 66 fotostarinad i videosüžetad 46 ühtnikalpäi erazvuiččiš Karjalan lidnoišpäi da rajonoišpäi. Karjalan eläjad jagoihe ičeze kanzoiden istorijoil, starinoičiba tradicijoiš, bahfalihe ičeze satusil.
“Natural’noje hoz’aistvo” -projekt om oigetud külän manelomišton, tradicionaližiden tedoiden da kanzan kal’husiden popul’arizoitandaha.
