Karjalan tedokeskusen radnik, tetab tedomez’ Irina Jurjevna Vinokurova sai suren arvznaman ičeze tedorados. Irina Vinokurova kirjuti enamba 150 tedoradod i jatktab oppida rahvahid da kehitoitta tedod Karjalan valdkundas.
—Nece om varastamatoi arvznam minun täht. Meletan, miše nece om ”Karjalan rahvahad”-kirjan abul. Se tuli täl vodel sureks lahjaks kaikile i äjile tuli mel’he. Mö panim sen tegemižehe tozi äi vaged, sanub Irina Vinokurova, arvostadud tedomez’, Kelen, literaturan da istorijan institutan etnologijan sekcijan pätedoradnik.
Irina Vinokurovan tedotöiden keskes oma tedoradnikan monografijad, openduzkirjad, kirjutesed. Üks’ kaikid tärtkembiš jäl’gmäižiden voziden tedoradoišpäi om ”Karjalan rahvahad. Istorijan etnografižed očerkad”-nimitadud monografii. Neciš kirjas oma nügüd’aigaližed tedod karjalaižiden, vepsläižiden da venälaižiden polhe, kudambad eläba Karjalan valdkundas.