Teatroin ohjuajat suajah uuttu neruo
– Parahine nygöi meijän veriät avvauttih ei-ammatillizien teatroin ohjuajile. Myö piemmö kolmen päivän praktiekkuseminuarua “Stsenografii. Dekoratsieloin da tarvittavien ezinehien valmistamine ei-ammatillizeh teatrah niškoi, on ilmoitannuh Karjalan rahvahan taijon keskus omal internet-sivul.
Seminuarah tuli kul’tuurulaitoksien ruadajii uhtestostu eländykohtaspäi: Sordavalas, Priäžäs, Vojačus, Segežas, Belomorskas, Kemis, Kalevalas, Kostamukses, Suojärves, Šuojus da Alavozespäi.
Idei järjestiä moine seminuaru rodih mulloi ei-ammatillizien teatroin festivualis. Tämän festivualin aigah löyttih ei-ammatillizien teatroin piälimäine probliemu – dekoratsieloin valmistandu. Seminuaran vedäjäkse da opastajakse rodih ammatilline akt’ouru, ohjuaju da taidoilii Boris Kudr’avtsev.
Kolmen päivän aloh rahvas opastutah luadimah dekoratsieloin da sobien eskiizoi, luadimah dekoratsieloi nygyaigazien tehnolougieloin mugah. Seminuaras opastetahgi oigieh liikkumah da pagizemah laval.
– Minuu kai miellyttäy täs seminuaras. Meidy opastau Boris Kund’avtsev, kudai ruadau enimite tyttilöinke, hänenl on oma tyttiteatru “Malen’kaja strana”. Myö luajimmo dekoratsieloin makiettoi, täs minul on eräs varustus, tänäpäi kuivau, huomei resuičen sidä dai rodieu halgo. Myö äijän tiijustammo dekoratsieloin materjualoih nähte, sanou Šuojun kul’tuurutaloin ruadai Jegor Komarov.
