Tazavallan päivy pietäh Suojärvel
Elokuun 29. päivänny Suojärven linnas Karjalan tazavallan päivän kunnivokse pietäh suuri pruazniekku. Pivon aigah ruvetah ruadamah kižakohtat lapsile da ruadopajat, pietäh torguu da konsertoi.
Eräs tärgevimii pidoloi roitah kul’tuurukeskuksen avajazet jälles perustehellistu remontua. Uvvistamah sidä ruvettih vuozi tagaperin kanzallizen Pereh-projektan hantuzis. Keskukses uudeh luaduh on kunnostettu konsertuzualu da lava, erähis pertilöis on korrendettu lait.
— Ammui vuotimmo sidä. Keskuksehhäi käydih aigua viettämäh nuoret dai vahnembat, lapset dai ruavahat. Meijän Suojärven linnale vaste kohendettu kul’tuurukeskus on aiga hyvä lahju tazavallan päiväkse, sanoi Oma Mediale suojärveläine Ol’ga Markova.
Pruazniekkupäivänny jogahine 10—15 čuasun välis suau tarkastua omua tervehytty Suojärven piiribol’ničas.
Pruazniekan suurembat pivot algavutah 15 čuasun aigah suurel laval Leninan lagevol. Sinne tulluot nähtäh Rakas linnu — Suojärvi -programman. Samas pivos ruvetah jagamah valdivollizii palkindoloi.
Suojärveläzih da kaikkih pruazniekkah tulluzih nähte rubieu pajattamah Dmitrii Koldun, Jevrovidenije — 2007 -kilvan finalistu.
Pruazniekan lopus 22 čuasun aigah pietäh ilotulet.
Yhty Oman Median kanualah MAX:as!
